Prijs di gasolin ta aumenta 25,1 cen den un solo biaha

ORANJESTAD – Chauffeurnan na Aruba lo enfrenta un aumento fuerte den prijs di combustibel entrante diaranson 12 di augustus. Gasolin  unleaded-premium ta subi cu 25,1 cen pa liter, di 265,8 cen pa 290,9 cen pa liter.

E aumento significa cu un tanki di 50 liter lo costa aproximadamente Afl. 12,55 mas cu na juli: di Afl. 132,90 pa cerca di Afl. 145,45.

Diesel ta subi ainda mas fuerte, cu 29,7 cen pa liter, pa yega na 286,3 cen. Kerosin ta aumenta cu 19,4 cen, pa 256,6 cen pa liter.

E ahuste di gasolin ta representa un aumento di aproximadamente 9,4% den un solo luna. Na juli, e prijs a baha cu 10,7 cen pa 265,8 cen, pero e aumento nobo no solamente ta elimina e rebaho ey; gasolin ta termina 14,4 cen mas halto cu prome cu e rebaho di juli.

Mirando mas atras den aña, e diferencia ta ainda mas grandi. Na januari 2026, gasoline tabata 210,7 cen pa liter. Cu e prijs nobo, e ta 80,2 cen mas caro, casi 38% mas den shete luna. Pa un tanki di 50 liter, esey ta representa alrededor di Afl. 40,10 mas compara cu principio di aña.

Diesel a pasa di 188,5 cen na januari pa 286,3 cen awor, un aumento di casi 52%, mientras kerosin a pasa di 175,6 pa 256,6 cen, cerca di 46% mas.

Apesar di e subida fuerte, gasolin ainda ta bou di e nivel extremo di juni 2022, ora e prijs na Aruba a yega na 321,2 cen pa liter.

E prijsnan nobo ta inclui BBO, BAZV y BAVP.