Deterioro mas serio descubri durante restauracion di Willem III Toren

ORANJESTAD – Durante e restauracion di Willem III Toren na Fort Zoutman, inspeccion a revela cu e ringbak exterior di e toren ta den un estado di deterioro mas serio cu inicialmente tabata anticipa. E hallazgo lo rekeri restauracion y posiblemente reemplaso adicional, aunque Monumentenbureau ta indica cu pa awor esaki no mester causa un retraso significativo den e proyecto.

Raul Gei di Monumentenbureau a confirma cu e restauracion principal ta sigui avanzando conforme plan. E organisacion ta preparando un solicitud di oferta pa atende e componente deteriora y integra e trabou adicional den e proyecto existente.

Apesar di e problema descubri, e expectativa actual ta cu restauracion principal di e toren por ta completa entre fin di oktober y fin di november 2026. Esaki incluso ta mas trempan cu e proyeccion inicial, cu tabata apunta na final di 2026 of principio di 2027.

Durante e trabounan, e equipo ta monitoria e structura pa sigura cu restauracion ta cumpli cu requisito tecnico y historico aplica na un monumento di e importancia di Fort Zoutman.

Willem III Toren ta un di e monumentonan historico mas reconocibel di Aruba. E restauracion ta parti di esfuerzo mas amplio pa conserva patrimonio cultural di e isla, cu tambe ta inclui otro edificacion historico na San Nicolas, Alto Vista y Brasil.