Aruba ta inicia investigacion nobo di herencia cultural bou awa

ORANJESTAD – Aruba ta prepara pa un expedicion maritimo nobo pa identifica, documenta y proteha su herencia cultural bou awa, incluyendo restonan di boto cu a sink y otro sitionan historico relaciona cu e pasado maritimo di e isla.

E proyecto ta un colaboracion entre Museo Arqueologico Nacional Aruba (MANA), IDNOVA, Aruba Conservation Foundation (ACF) y e organisacion internacional di investigacion maritimo Inkfish LLC.

E expedicion ta programa di 25 di augustus te 15 di september 2026, durante cual investigacion lo tuma luga rond costa di Aruba abordo di e barco RV Hydra. Tecnologia avansa lo wordo usa, incluyendo mapa di fondo di lama cu resolucion halto, imagen 3D y sistemanan pa investigacion den awa hundo.

Arkeologo Harold Kelly di MANA y Oriana Wouters di IDNOVA lo forma parti di e team di investigacion internacional. Un meta importante ta pa profesionalnan local haya experiencia practico, pa Aruba por sigui desarrolla su propio capacidad pa investiga y proteha patrimonio bou awa.

E iniciativa ta sigui riba entrenamiento cu profesionalnan Arubano a ricibi na 2025 segun metodonan internacional di UNESCO. E conocemento ey a wordo aplica caba den investigacion di herencia maritimo den San Nicolas Bay y na SS Pedernales, cu participacion di sambuyadonan local.

Un acuerdo firma ta stipula cu e data cientifico colecta durante e expedicion lo keda accesibel pa Aruba, pa por wordo usa den futuro investigacion, educacion y proteccion di herencia cultural.

Durante e expedicion, e organisacionnan involucra ta plania comparti actualisacionnan cu publico tocante e investigacionnan bou lama di Aruba.