Aruba, Corsou y Sint Maarten ta prepara legislacion hunto pa futuro pandemia

ORANJESTAD – Aruba, Corsou y Sint Maarten ta trahando hunto riba legislacion nobo pa fortalece preparacion pa futuro pandemia y combate enfermedadnan infeccioso. Pa completa e parti huridico di e proceso, Aruba ta destina un maximo di casi 50.000 euro.

E proyecto ta enfoca riba salud publico, control di enfermedad infeccioso y preparacion pa crisis sanitario. Un prome fase y parti di e segundo fase a wordo completa caba, pero segun Gobierno di Aruba, e financiamiento anterior no tabata suficiente pa finalisa tur e trabou.

Den e siguiente fase mester completa entre otro conceptonan di ley, memoria di aclaracion y diferente opinion y documento huridico. E hurista encarga tambe lo brinda sosten durante e proceso politico y eventual implementacion di e legislacion. E asignacion ta core di 1 di juli 2026 te cu 31 di maart 2027.

E fondo ta bin di un subsidio di Ministerio Hulandes di Asuntonan Interior y Relacionnan den Reino. Aruba ta presidente di e grupo di direccion di e cuater paisnan pa preparacion contra pandemia y ta encarga tambe cu e administracion di e subsidio.

Gobierno a opta pa duna e encargo directamente, sin un proceso di aanbesteding, na un hurista cu tabata involucra den fasenan anterior. Normalmente, un encargo di e tamaño aki lo cai bou un proceso di aanbesteding limita. Segun Gobierno, continuidad, conocemento specifico di e expediente y experiencia di e jurista ta hustifica e excepcion.

E iniciativa ta mustra cu Aruba, Corsou y Sint Maarten kier crea un base legal permanente pa maneha futuro crisis di salud, en bes di depende solamente riba plan di emergencia temporal.