UPDATE: Cifra di morto despues di temblor na Colombia subi na 169; mas di 900 herido

BOGOTA – E balance di victima despues di e fuerte temblor di magnitud 7,4 cu a sacudi Colombia dialuna 10 di augustus ta sigui aumenta. Segun e ultimo informacion di Asocapitales, e cifra di morto a subi na 169, mientras mas di 900 persona ta raporta herida.

E daño material tambe ta considerable. Por lo menos 1.575 cas a wordo afecta, 61 edificio a colapsa y seis aeropuerto a sufri daño como consecuencia di e temblor, cu su epicentro tabata cerca di San José del Palmar, den departamento di Chocó.

Pereira ta continua como uno di e zonanan mas duro afecta. E ultimo informacion for di e ciudad ta indica 72 morto, 37 persona desapareci y 15 persona ainda atrapa bou di escombro. Un grupo di mas di 260 rescatista ta trahando den e area, mientras autoridadnan ta prepara pa intensifica e operacion di buskeda.

Como parti di e medidanan di emergencia, lesnan a wordo suspende y un toke de queda a wordo implementa na Pereira. Diferente refugio y centro pa colecta ayuda humanitario tambe a wordo habilita.

Na Cali, equipo di rescate a logra saca un homber di 35 aña na bida for di bou di escombro. Segun autoridadnan, e homber a sufri heridanan leve y ta fuera di peliger.

Presidente Abelardo De La Espriella a declara e situacion como un desaster nacional, mientras operacionnan di rescate ta continua den diferente ciudad. Venezuela tambe a ofrece manda rescatista y ayuda humanitario pa asisti Colombia.