Stichting Parkietenbos: “Cuida Aruba” mester inclui salud di comunidad

ORANJESTAD – Stichting Parkietenbos a expresa preocupacion tocante e reciente Dia Nacional di Limpiesa organisa bou di e slogan “Cuida Aruba”. Segun e fundacion, tur iniciativa pa tene Aruba limpi ta positivo, pero e mensahe mester bay mas leu cu limpieza di mondi y beachnan.

E fundacion ta señala cu miles di habitantenan den e area di Mahuma, Parkietenbos, Simeon Antonio, Buena Vista y otro bario cercano ta enfrenta regularmente holo fuerte, musca y contaminacion di aire relaciona cu maneho di desperdicio na Barcadera y deramento di desperdicio na Ser’i Teishi.

Stichting Parkietenbos ta bisa cu durante  un periodo di tempo el a manda diferente carta na Gobierno di Aruba, incluyendo e gobierno actual, pa alerta riba loke e considera un problema serio pa salud publico y calidad di bida di habitantenan den e area.

Segun e fundacion, tin un contradiccion entre un campaña nacional cu ta promove limpieza y un situacion den cual comunidadnan cercano ta sigui sufri consecuencia di maneho di desperdicio.

“Cuida Aruba no por limita su mes solamente na haci limpi den mondi of beachnan, mientras cu na mes momento e maneho di desperdicio ta sigui crea contaminacion di aire cu ta afecta comunidadnan,” Stichting Parkietenbos ta señala den su comunicado.

E fundacion ta pidi Gobierno pa para cu deramento di desperdicio na Ser’i Teishi y pa tuma medida concreto contra holo, contaminacion di aire y otro molestia cu e situacion actual ta causa.

Tambe e ta solicita pa Stichting Parkietenbos, como representante di habitantenan afecta, wordo inclui den decisionnan importante tocante futuro di maneho di desperdicio na Aruba.

Segun e fundacion, e habitantenan no ta pidi trato special, sino e mes derecho fundamental cu tur ciudadano: por biba den un ambiente sano y hala rosea di aire limpi.

“Cuida Aruba no ta solamente limpia e isla. Cuida Aruba ta proteha su pueblo tambe,” e comunicado ta conclui.