Control na KIA a frustra intento pa pasa droga den prizon

ORANJESTAD – Vigilancia di personal di KIA a resulta den deteccion y frustracion di un intento pa introduci droga den prizon durante un entrega rutinario di ijs.

Segun Ministro di Husticia Arthur Dowers, personal di KIA a nota comportacion sospechoso cerca di e entrega y a actua inmediatamente. E caso actualmente ta bao investigacion pa determina exactamente kico a sosode, si tin mas persona envolvi y si e intento ta parti di un actividad mas amplio.

Dowers a elogia e vigilancia di e empleadonan di KIA y a enfatisa cu introduccion di droga of cualkier otro articulo prohibi den prizon ta completamente inaceptabel.

“No ta importa si e intento ta bin di pafo of si tin hende di paden envolvi. Tur persona cu ta drenta KIA mester compronde cu tin regla y control cu mester respeta,” e mandatario a indica.

Segun e ministro, autoridadnan ta mantene atencion estricto no solamente riba droga, sino tambe riba telefon celular y otro tipo di contrabanda cu por pone orden y siguridad dentro di KIA na peliger.

Dowers a enfatisa cu personanan cu tin acceso na KIA pa trabou, entrega of otro servicio no por uza e oportunidad ey pa introduci articulonan prohibi. Si investigacion determina cu tin mas persona envolvi, autoridadnan lo actua di acuerdo cu ley.