Colombiana residente na Aruba ta conta di e panico durante temblor na Colombia

BOGOTA – Lucy Bohorquez, un Colombiana residente na Aruba cu actualmente ta na Bogota di vacacion, a experencia e temblor fuerte cu a sacudi Colombia awe personalmente.

Bohorquez a conta Noticiacla cu na Bogota e temblor a sinti fuerte y cu p’e e momento tabata algo particularmente angustiante.

“Pa mi, berdaderamente tabata algo horibel. Tabata un sensacion manera bo ta bay cai. Mi tabata bira marea y mientras mi tabata baha trapi, mi tabata sinti cu mi tabata balancea di un banda pa otro. Mi tabata sinti cu mi no por a sigui baha,” el a conta.

Segun Bohorquez, aunke na Bogota e movecion a sinti fuerte, despues el a compronde cu den otro partinan di Colombia, entre otro Cali, Pereira y Choco, e situacion tabata mas intenso.

Durante e confusion despues di e temblor, Bohorquez a mira diferente video y mensahe circulando. Den un di e videonan, algo a hala su atencion: un persona a cuminsa papia Papiamento.

“Mi a tende e persona papia Papiamento y mi a bisa: ‘E persona aki ta di Aruba’. E tabata conta cu e tabata den un hotel y cu tabatin varios persona di Aruba hospeda aya, cu aparentemente a bay Colombia pa un cirugia,” Bohorquez a conta.

Sinembargo, el a aclaria cu den e momento di panico y confusion no a logra confirma den cua ciudad e hotel tabata, ni kende e personanan den cuestion ta.

“Den e desespero, un hende tabata jama otro, otro tabata manda mensahe. Mi no a logra sigui tur cos bon. Pero cu nan tabata relaciona cu Aruba mi a reconoce pa e Papiamento,” el a bisa.

Pa Bohorquez, e impresion mas fuerte tabata e sensacion di perde control di su propio ekilibrio mientras e edificio tabata move.

“Bo ta sinti cu bo ta bay cai y cu bo no por controla bo curpa. Pa mi esey tabata algo horibel,” el a expresa.

E testimonio di Bohorquez ta duna un impresion personal di con e temblor a wordo experimenta na Bogota, mientras na Aruba atencion tambe ta dirigi riba posible residentenan di nos isla cu actualmente ta na Colombia.