AZV ta monitorea 238 asegurado na Colombia despues di temblor

ORANJESTAD – AZV ta sigui  e situacion di su aseguradonan na Colombia despues di e temblor fuerte cu a sacudi e pais di cerca. Actualmente tin alrededor di 238 asegurado di AZV na Colombia, incluyendo pacientnan y nan acompañantenan.

Segun AZV, e organisacion ta den contacto estrecho cu su partnernan na Colombia pa sigui situacion di e aseguradonan y coordina apoyo si esey ta necesario.

Despues di e temblor, varios persona a wordo evacua for di edificionan como medida di precaucion. Segun informacion cu AZV a ricibi, entretanto na varios lugar a duna permiso pa personanan drenta e edificionan bek.

AZV ta indica cu cualkier paciente of acompañante asegura cu tin necesidad di asistencia por reporta esaki na International Office di e hospital concerni. Di e forma ey, AZV por coordina y ofrece e apoyo necesario.