Leoncita Arends a raporta na KIA pa cumpli condena di caso Avestrus

ORANJESTAD – Leoncita Arends a raporta na KIA awe mainta pa cuminsa cumpli cu e condena definitivo cu el a ricibi den caso Avestrus. Su abogado Doris Canwood a confirma esaki dialuna pa Noticiacla. Arends tabata e ultimo di e tres condenadonan principal den e parti aki di caso Avestrus cu ainda mester a raporta, despues cu Hoge Raad na Hulanda a rechasa su recurso di casacion na 14 di april 2026. Cu esey, e sentencia dicta pa Gemeenschappelijk Hof na juli 2024 a bira definitivo. Esnan cu a raporta caba tabata ex parlamentario y minister Benny Sevinger y comerciante Piet Sussebeek. 

CONDENA 

Hof a condena Arends pa fraude, cometi varios biaha, y soborno activo di un funcionario publico. Den e caso di soborno, Corte a considera proba cu Arends a entrega un suma di placa cu intencion pa influencia e tempo ey minister Benny Sevinger pa facilita derecho di opcion y erfpacht riba terenonan na Wayaca. E condena ta 24 luna di prison, di cual 12 luna ta condicional, cu un periodo di prueba di tres aña. Tempo cu Arends ya a pasa den detencion preventivo mester wordo deduci for di e parti incondicional di su condena. Den e parti di fraude, Hof a considera proba cu Aruba a wordo engaña den proceso pa otorga derecho di opcion y erfpacht na companianan relaciona cu Arends, mientras e construccion a contribui na aumento di balor di e companianan y beneficio financiero.

Cu Hoge Raad a rechasa e casacion, ya no tabatin un otro instancia regular pa cambia e condena. Arends a raporta awe na KIA pa ehecucion di e sentencia.