Delta ta lansa buelo directo entre Detroit y Aruba na december

ORANJESTAD — Delta Air Lines ta prepara pa introduci un buelo directo nobo entre Detroit, Michigan, y Aruba, cuminsando dia 19 di december 2026. E conexion ta forma parti di un expansion internacional di shete ruta cu e aerolinea mericano ta introduci durante temporada di invierno 2026–2027.

E buelo entre Detroit Metropolitan Wayne County Airport y Aeropuerto Internacional Reina Beatrix lo opera tur diasabra, un biaha pa siman, cu un avion Boeing 737-900ER.

E ruta aki ta representa un conexion completamente nobo pa Delta, y no un reanudacion di un servicio anterior. Pasaheronan for di Detroit lo por biaha directamente pa Aruba, sin necesidad di haci escala na otro aeropuerto mericano.

Pa Aruba, e conexion nobo ta un oportunidad pa fortalece su accesibilidad for di mercado mericano, particularmente region di Michigan y e medio oeste di Merca. E servicio por contribui na atrae mas bishitante durante temporada turistico di invierno.

Ademas di Aruba, Delta ta amplia su red internacional cu conexionnan entre New York y Costa Rica, Los Angeles y Vancouver, Atlanta y Tel Aviv, Seattle y Tokyo, Austin y Paris, y Atlanta y Riyadh na Arabia Saudita.

E shete rutanan ta programa pa cuminsa entre november 2026 y maart 2027, como parti di strategia di Delta pa fortalece su presencia internacional.

E fecha y frecuencia di e vuelonan ainda por cambia, dependiendo di demanda y ahustenan operacional.