CISI: Aruba nombra isla mas sigur di Caribe pa bishita

ORANJESTAD – Aruba a wordo nombra e isla mas sigur di Caribe pa bishita, segun e Caribbean Island Safety Index 2025, un ranking cu ta compara 10 destinacion popular den region.

Aruba a logra un score di 9.3 di 10, e resultado mas halto den e evaluacion. E indice ta basa riba cuater factor principal cu por influencia seguridad di bishitante: criminalidad, advertencianan oficial di biahe di Merca, acceso na cuido medico y riesgo di huracan.

Un di e bentahanan importante di Aruba ta su ubicacion relativamente sigur pa tormenta tropical y huracan. Mientras temporada di horcan den Caribe ta normalmente entre juni y november, Aruba ta situa mas zuid y ta menos frecuentemente afecta directamente pa huracan compara cu hopi otro isla den region.

E publicacion ta destaca tambe Aruba su beachnan blanco, awa turkesa y infrastructura turistico, ademas di bon conexion aereo cu diferente ciudad grandi na Merca.

Aeropuerto Internacional Reina Beatrix tin conexion cu, entre otro, New York, Miami, Atlanta y Dallas. Ingles ta ampliamente papia na Aruba y dollar Mericano ta wordo acepta na hopi establecimiento, algo cu ta facilita estadia di bishitantenan Mericano.

Segun e ranking, combinacion di un nivel relativamente halto di seguridad, bon acceso na cuido medico y riesgo menor di horcan a pone Aruba na cabez di e destinacionnan mas sigur den Caribe.