Nina den Heyer ta prepara regreso politico na Boneiro cu partido nobo ANIMO

KRALENDIJK – Personahe conoci di Boneiro Nina den Heyer ta preparando un regreso formal den arena politico cu su propio partido, ANIMO, cu segun informacion cu Noticiacla tin, lo wordo presenta oficialmente den luna di september.

E entrada di ANIMO por agrega un elemento nobo na panorama politico di Boneiro den direccion di e siguiente eleccionnan di Eilandsraad, programa pa maart 2027. Den Heyer no ta un desconocido pa electorado: durante añanan e tabata un di e caranan mas prominente den politica y sector social di e isla.

Segun informacion cu e portal aki tin, sede di ANIMO na Tera Kora ta den preparacion pa e lansamento oficial den september. E partido nobo ta wordo asocia directamente cu Den Heyer, kende despues di varios periodo como diputado y un retiro anterior for di politica activo, aparentemente ta cla pa bolbe presenta su vision directamente na electorado.

DI MPB PA SU PROPIO PARTIDO

Den Heyer a drenta politica partidario cu Movementu di Pueblo Boneriano, MPB. Den un publicacion anterior e mes a indica cu e la uni cu MPB na 2013, buscando renobacion den politica di Boneiro despues di cambio constitucional di 10-10-10. Na mei 2016 e la bira diputado cu responsabilidad, entre otro, pa asuntonan social, educacion, hubentud, cultura y salud publico.

SU MOMENTO ELECTORAL MAS FUERTE A YEGA NA 2019

Aunke Den Heyer tabata number dos riba lista di MPB, e la ricibi 1.082 voto preferencial, mas cu ningun otro candidato den eleccion di Eilandsraad di e aña ey. E la supera incluso lider di MPB Elvis Tjin-Asjoe, kende a logra 629 voto.

E resultado a confirma Den Heyer como un di e politiconan cu mayor poder electoral personal na Boneiro na e momento ey.

Su popularidad aparentemente no tabata limita solamente na urna. Un encuesta publica na 2020 a mustra cu entre e dipudatonan evalua, Den Heyer tabata wordo aprecia mas positivo, cu un nota promedio di 6,9. Respondentenan a describie, entre otro, como autentico, aunke critica tabatin tambe cu e mester actua mas decisivo y independiente.

RETIRO FOR DI POLITICA Y REGRESO

Na 2022 Den Heyer a anuncia cu e lo sali for di politica activo. Despues e la bira hefe di OCW Caribisch Nederland. Prome cu esey, e tabatin experiencia amplio den sector publico, incluyendo trabou como plaatsvervangend hoofd di Sociale Zaken en Werkgelegenheid di Rijksdienst Caribisch Nederland. Pero su retiro politico no a dura.

Na november 2023 Den Heyer a bolbe como diputado den Bestuurscollege nobo forma pa coalicion di PDB, M21 y Fractie Vrolijk. E biaha ey e la drenta como un "vakgedeputeerde", esta sin representa formalmente un partido politico den Gobierno. Su cartera tabata Samenleving en Zorg.

Na juli 2025, Den Heyer y su colega Anjelica Cicilia a entrega nan retiro como dipudato cu efecto inmediato, un decision cu a provoca pregunta tocante stabilidad politico di Boneiro. Gobierno di Boneiro a confirma oficialmente nan retiro dia 26 di juli 2025.

Durante su periodonan como gobernante, Den Heyer a crea un perfil principalmente den area social. Su lucha contra pobreza, atencion pa adultonan mayor y gruponan vulnerabel, y su involucramento cu cultura y idioma Papiamento tabata parti importante di su imagen publico.

Criticonan ya ta cuestiona si ANIMO ta representa un movimento politico nobo cu su propio identidad, of principalmente un vehiculo electoral crea alrededor di popularidad personal di Den Heyer. Su sostenedornan, di otro banda, por mira den dje precisamente un oportunidad pa un politica conoci cu experiencia administrativo opera cu mas autonomia.

Loke ta sigur ta cu entrada di ANIMO por cambia calculonan politico na Boneiiro.

Den Heyer ya a demostra un biaha cu e por hala un cantidad grandi di voto riba su propio nomber. Awor, cu su propio partido, e pregunta principal ta si e por haci esey atrobe.

E prome indicacion mas concreto lo yega den september, ora ANIMO ta wordo spera di presenta su mes oficialmente na pueblo di Boneiro.