Retraso di Gobierno ta pone inversion den Oranjestad na peliger

ORANJESTAD – Oranjestad Investment Group (OIG), e grupo cu ta representa comerciantenan y inversionistanan den centro di Oranjestad, ta pidi Gobierno pa duna mas direccion, mihor coordinacion y accion concreto pa acelera revitalisacion di capital di Aruba.

Segun un comunicado di prensa di OIG, durante e ultimo aña representantenan di Gobierno a reuni cu e organisacion, a bishita diferente sitio den centro di ciudad y a firma un Letter of Intent cu e compromiso pa traha hunto riba revitalisacion di Oranjestad.

OIG ta considera e pasonan aki positivo, pero ta indica cu varios proyecto ainda ta stanca pasobra aprobacionnan y accion concreto di parti di Gobierno no a materialisa.

Na mesun momento, inversionistanan priva ta sigui compromete recurso significativo. Segun OIG, nan ta cumpra propiedad, regla financiamiento, prepara plan arkitectonico y di ingenieria y desaroya propuesta comercial. Sinembargo, preocupacion ta aumentando entre inversionistanan pa motibo di e retraso continuo y incertidumbre tocante implementacion di e proyectonan.

OIG ta enfatisa cu revitalisacion di centro di Oranjestad ta mucho mas cu inversion den propiedad. Segun e organisacion, un centro mas dinamico por crea empleo, fortalece comercio local, contribui na seguridad publico y genera actividad economico cu finalmente ta beneficia Aruba completo.