ORANJESTAD — E economia informal na Aruba ta representa aproximadamente 19% di Producto Interno Bruto (PIB), equivalente na Afl. 1,4 biyon, y segun estimacion ta causa un perdida di Afl. 340 miyon anualmente den entrada pa Gobierno. Esaki ta surgi for di un informe di Comision di Economia Informal di Camara di Comercio (KvK).
Segun e comision, actividadnan economico no registra ta crea competencia desleal pa empresanan formal, mientras trahadornan den e sector informal frecuentemente no tin proteccion laboral ni social.
Pa enfrenta e problema, KvK a desaroya un plan pa stimula empresarionan informal pa registra nan negoshi, ofreciendo orientacion, educacion y asistencia practico, en bes di depende solamente riba sancionnan.
E iniciativa ta inclui campañanan informativo, video educativo y un guia cu ta splica paso pa paso con pa registra un negoshi, habri cuenta bancario y cumpli cu obligacionnan fiscal y social.
Tambe lo organisa sesionnan di asistencia pa empresarionan, mientras KvK ta busca cooperacion cu Departamento di Impuesto, DEZHI, SVb, bancanan y organisacionnan empresarial.
E comision ta pone atencion special na benta online sin registracion, tournan informal, huurmento di propiedad pa corto temporada sin permiso y trabou di construccion paga den efectivo.
E meta ta pa reduci competencia desleal, amplia e base di contribuyentenan y fortalece un economia mas transparente y sostenibel na Aruba.