ORANJESTAD — Un investigacion di Aruba Fair Trade Authority (AFTA) ta mustra cu Aruba ta paga aproximadamente Afl. 243 miyon anualmente pa transporte di carga di productonan importa, equivalente na 10% te 13% di nan balor. Esaki ta supera e promedio mundial di 8,1% y e promedio di 11,6% pa estadonan insular chikito den Caribe.
Segun AFTA, e costonan halto ta relaciona cu Aruba su mercado chikito, su ubicacion pafor di e rutanan maritimo principal y e cantidad limita di container. Ademas, Aruba ta importa mucho mas cu e ta exporta, provocando cu hopi container mester wordo transporta bek bashi, cu gastonan adicional.
Competencia limita y monopolionan den sector ta otro punto di atencion. Aruba Stevedoring Company (ASTEC) ta opera e unico terminal di container, mientras Aruba Ports Authority (APA) ta administra e unico waf di carga. AFTA no a encontra indicacion di violacion di ley di competencia, pero ta exigi mas transparencia tocante tarifanan, gastonan y entradanan.
E investigacion ta revela cu entre 2014 y 2024, e pagonan di concesion cu APA a ricibi di ASTEC tabata constantemente mas halto cu e gastonan relevante di infrastructura portuario. ASTEC ta paga APA 35,25% di su entrada bruto como canon di concesion.
AFTA ta recomenda pa evalua e structura di concesion y investiga posibilidadnan pa atrae mas companianan di transporte maritimo, particularmente un segundo conexion directo for di Merca. Tambe ta propone estudia si Aruba por desaroya un funcion logistico regional.
Segun AFTA, mas competencia y transparencia por contribui na reduccion di costonan di transporte, cu ta un di e factornan cu ta influencia e prijsnan halto di productonan na Aruba.