Cu un inversion di Afl. 3,2 miyon, Aruba ta introduci declaracion di impuesto completamente digital

Cu un inversion di Afl. 3,2 miyon, Aruba ta introduci declaracion di impuesto completamente digital

Posted on 11/19/2026, 2:55 PM AST | Updated on 11/19/2026, 2:56 PM AST

ORANJESTAD — Despues di nuebe aña di modernisacion, Departamento di Impuesto (DIMP) a logra digitalisa completamente e proceso di declaracion di impuesto riba entrada pa personanan individual, cuminsando cu aña fiscal 2025. E proyecto, cu ta representa un inversion di Afl. 3,2 miyon, ta permiti contribuyentenan yena y entrega nan declaracion via portal BO Impuesto (BOi), sin necesidad di formulario riba papel ni bishita na oficina di Impuesto.

Minister di Finansa Geoffrey Wever a destaca cu e sistema nobo ta un paso importante pa mehora eficiencia di servicio publico y acelera e proceso di restitucion di impuesto.

Segun DIMP, 25.196 contribuyente, equivalente na 46% di tur contribuyente activo pa impuesto riba entrada, ya a registra nan mes den e portal digital.

E transformacion di DIMP a cuminsa cu declaracionnan mensual di empresanan y gradualmente a amplia cu servicio manera consulta di estado di cuenta, historia di pago, areglo di pago y pago online.

E resultadonan ta mustra cu e porcentahe di cumplimento di declaracionnan mensual a aumenta di 64% pa entre 80% y 90%.

Wever a felicita directora di DIMP, Luenne Gomez-Pieters, y su team pa e trabou di nuebe aña cu a conduci na e modernisacion, cu ta forma parti di e programa di Gobierno AVP–FUTURO pa amplia servicio digital y fortalece administracion publico.