Abelardo de la Espriella a huramenta como presidente di Colombia

CALI – Abelardo de la Espriella, di 48 aña, a huramenta como presidente nobo di Colombia durante un ceremonia na Cali, na luga di e tradicional inauguracion na Bogota.

De la Espriella, un lider ultraderechista y aliado di Presidente Donald Trump, a anuncia un cambio radical compara cu e politica di su antecesor Gustavo Petro. E mandatario nobo kier combati cartel di droga y gruponan arma cu un politica mucho mas duro, lagando atras e strategia di negociacion di e Gobierno anterior.

Durante su discurso, De la Espriella a bisa cu gruponan criminal arma tin dos opcion: entrega nan mes na autoridad of enfrenta e forzanan di seguridad. E tambe a declara cu su meta ta restaura "ordo, autoridad y libertad" den Colombia.

De la Espriella a gana e segunda ronda electoral na juni contra Ivan Cepeda, aliado di Petro. E ta un empresario y abogado penal cu a financia gran parti di su campaña cu su propio capital.

Su programa politico ta inclui reduci tamaño di Estado cu aproximadamente 40%, reactiva sector di petroleo y gas, restaura relacion diplomatico cu Israel y corta relacion cu Cuba y Nicaragua.

Petro, kende inicialmente a cuestiona resultado di e eleccion, a bisa cu e ta respeta e resultado, aunke ta wordo spera cu e lo bira un opositor fuerte di e Gobierno nobo.

Na diferente ciudadnan a tuma luga protesta contra De la Espriella.

Poco despues di e inauguracion, Merca a anuncia cu lo pone un biyon dollar disponibel pa Colombia pa combati narcotrafico y gruponan arma.