Vrolijk(MEP): Gobierno ainda sin plan structural pa desperdicio

ORANJESTAD – Parlamentario Edgard Vrolijk ta bisa cu, aunke e Dia Nacional di Limpiesa tabata un bon iniciativa pa crea conscientisacion, Gobierno ainda no tin un plan structural y duradero pa maneho di desperdicio na Aruba.

Segun Vrolijk, despues di casi dos aña na poder, Gabinete AVP-FUTURO ainda no a presenta un plan concreto pa modernisa Serlimar ni pa ofrece un solucion permanente pa procesa desperdicio. E ta señala cu e situacion actual na Sero Teishi ta sigui causando molestia pa habitantenan y ta afecta medio ambiente.

Vrolijk tambe ta critica e falta di control contra dumpnan ilegal. Segun e, apesar di cu e ley ta permiti multa di te Afl. 10.000, e reglanan no ta wordo aplica cu suficiente rigor. E ta bisa cu solamente cu un ehecucion mas estricto di ley y un vision a largo plazo lo Aruba por logra controla e problema di desperdicio.