Analisis: Ora e glamour perde pa falta di dress code

Scirbi pa Tito Laclé

Tin algun tema cu, pa hopi hende, por parce insignificante. Pero te ora bo experencia nan personalmente, bo ta ripara cu nan por cambia completamente con bo ta biba un momento. Mi a yega scirbi riba e tema un biaha caba, y a haya hopi reaccion. Recientemente sinembargo, mi a bolbe experencia e situacion y e la bolbe molestia mi. Mi a pensa, ta tempo pa atende cu e asunto aki un biaha mas. Bo nunca sa, porta e biaha aki, algo por cambia?

Mi a topa mi mes den un situacion asina recientemente, y no tabata e prome biaha (manera mi a bisa). Esey a haci mi pensa: ta mi so cu ta mira esaki, of tin hopi otro hende cu ta sinti mescos?

Imagina cu bo a haci reserva den un restaurant elegante pa un ocasion especial. Lo por ta un cena romantico cu bo pareha, un reunion importante di negoshi of simplemente un anochi cu bo kier disfruta un bon experiencia. Bo ta bisti conforme cu e ocasion: camisa, carson largo, sapato; bo pareha tambe ta elegantemente bisti. Tur cos ta contribui pa crea e ambiente cu bo tabata sperando.

Pero di un momento pa otro un grupo di bishitante ta drenta den e mesun restaurant cu short, slof y T-shirt, manera cu nan a sali directamente for di beach. Lo mas insolito tabata cu e personal ta ricibi nan cu un sonrisa y nan ta sinta sin ningun problema. Naturalmente, cada persona tin derecho di bisti manera e ta sinti confortabel, pero e pregunta ta: e atmosfera den e restaurant ta keda mescos? Pa mi, e contesta ta no.

ANTES

Mi ta corda bon bon con antes Aruba tabatin cierto establecimentonan cu tabata tene nan standardnan. Lugarnan manera Club Scaramouche, Chest Matilde y Crystal Casino tabatin un dress code cla despues di seis'or di atardi. No tabata importa si bo tabata local, turista of un persona famoso. Si bo no tabata bisti apropiadamente, bo no tabata drenta. Mi ta corda incluso un actor Venezolano cu a wordo saca for di un nightclub pasobra el a intenta drenta cu keds. Awe por mira esaki como hopi severo, pero e regla tabata igual pa tur hende.

AWE

Awe, e unico rekisito cu hopi establecimento ainda tin ta un mensahe cu ta bisa: "No shoes, no shirt, no service." Den otro palabra, basta cu bo tin algo bisti. Si bo ta cu short, slof y un T-shirt den un restaurant di luho, generalmente no tin problema. Esey no ta aplica solamente pa restaurantnan, sino tambe pa casino y otro establecimentonan.

Den e tempo cu mi tabata traha den industria turistico, mi a tende hopi biaha e mesun splicacion, principalmente di bishitantenan Mericano. Nan ta bisa cu nan a paga hopi placa pa bin vacantie den Caribe y cu, precisamente pasobra nan ta riba un isla tropical, nan kier bisti comfortable. Pa nan, vacantie no ta combina cu camisa manga largo ni carson largo. Ta un forma di pensa cu, di un banda, ta comprendibel. Pero e percepcion cu ta di vacantie riba un isla automaticamente kier men cu bo por bay tur caminda cu short y slof, no semper ta corresponde cu e tipo di establecimento cu bo ta bishita.

Curiosamente, ora mi a papia cu diferente propietarionan di restaurant y otro negoshi, mi a haya tende cu e decision no tin tanto di haber cu cultura, sino cu economia. E contesta tabata casi semper mescos: "Mi ta prefera laga e cliente drenta cu short cu no haya e cliente mes." Den un mercado competitivo, unda costo ta subi constantemente y cada mesa ta conta, hopi empresario no por permiti nan mes ta demasiado rigido.

Y esey ta comprensibel.

Pero tambe tin un otro banda di e moneda. Un restaurant no ta bende solamente un tayo di cuminda. E ta bende un experiencia. E ambiente, e atmosfera, e sensacion di elegancia ta forma parti di loke e cliente ta paga. Ora e ambiente cambia completamente, automaticamente e experiencia di e otro clientenan tambe ta cambia. No pasobra un T-shirt of un short ta algo malo, sino pasobra e expectativa cu e establecimiento mes a crea ta cambia.

Mundo eifor ta mustra cu ainda tin lugar pa un dress code. Den diferente restaurantnan di luho na Monaco, Dubai, Singapore, Italia y New York, por ehempel, ainda tin regla tocante con un cliente mester bisti despues di cierto ora. Incluso den diferente resort di luho den Caribe, algun restaurant ta exigi carson largo y sapato cera pa cena. Esaki no ta pa discrimina ni pa humiya ningun cliente, sino pa preserva e experiencia cu e establecimiento kier ofrece.

Naturalmente, ningun empresario kier manda un cliente cas. Pero ningun marca cu kier posiciona su mes den segmento di luho kier perde su identidad tampoco. Y esey, posiblemente, ta e ekilibrio dificil cu hopi establecimento na Aruba ta enfrentando awe.

Esaki no ta un discusion entre local y turista. Tampoco no ta un cuestion di si un T-shirt ta di marca of no. E berdadero pregunta ta mucho mas amplio: ki tipo di experiencia Aruba kier ofrece?

Personalmente, mi ta kere cu un punto medio ta posible. No ta necesario exigi bachi y dashi, pero tampoco mi no ta mira nada straño den hecho cu un restaurant elegante pidi un minimo di presentacion despues di cierto ora. Esaki no ta un mensahe contra turista. Al contrario, ta un manera di proteha e ambiente cu e establecimiento a crea pa tur su clientenan.

Al final, e pregunta no ta si un turista tin derecho di bisti short y slof. E pregunta ta si un restaurant elegante tin derecho di preserva e atmosfera cu e ta bende. Y posiblemente, e contesta riba e pregunta ey lo determina con nos industria di hospitalidad lo sigui evoluciona den futuro. Mi tin speransa cu esaki por yega na e lugarnan concerni y cu por mira diferencia dentro di algun tempo?