Basa riba articulo di Noticiacla, MEP kier prome minister Eman splica riba menasa di Venezuela pa islanan ABC

ORANJESTAD – Lider di partido MEP y parlamentario Evelyn Wever-Croes a haci un serie di pregunta na prome minister Mike Eman, basa riba un articulo cu Noticiacla a publica e siman aki, riba e situacion geo politico cu Venezuela. E articulo cu Noticiacla a publica ta indica cu un general halto hulandes ta mustra cu e situacion di Venezuela ta un menasa pa islanan ABC. E parlamentario a haci 13 pregunta na e prome mandatario basa riba e articulo, y a pidi pa haya contesta den 2 siman di tempo. 

E PREGUNTA

Segun Wever-Croes, e articulo di prensa di Noticia Cla di 23 di september 2025 (bijlage) ta mustra cu Comandante  Liebregs a bisa cu Venezuela ta representa un menasa serio pa e islanan ABC. “ Pa motibo di esaki mi ta plantea e siguiente preguntanan”:

1. Con motibo di cu, a pesar di su promesa den conhunto di seniornan di 21 di augustus pasa, e Prome Ministro te awor no a informa e Staten tocante e menasa aktual di seguridad cu ta bin for di Venezuela?

2. E gobierno ta na altura di e advertencianan recien di Comandante Liebregs?

3. Con e gobierno ta evalua e menasa aki?

4. Por e Prome Ministro splica con grandi e riesgo ta cu Venezuela lo tuma accion militar efectivo contra e islanan ABC, y especificamente Aruba?

5. Cua plan di emergencia tin actualmente pa proteha e pueblo di Aruba den caso cu tin un escalacion militar?

6. Con e cooperacion ta bini cu Marina Real y Defensa Hulandes pa garantisa seguridad di Aruba?

7. Tin acuerdo haci pa fortifica e capacidad militar den Caribe?

8. Na cua manera e gobierno lo garantisa comunicacion di crisis oportuno y transparente na e pueblo den caso di un menasa mas halto of un atake directo?

9. Cua paso diplomatico e gobierno ya a tuma na direccion di Venezuela y partnernan internashonal pa baha tension y preveni escalacion?

10. Cua evaluacion e gobierno a haci tocante e posibel consecuencianan di e menasa aki pa turismo na Aruba?

11. Cua medida ta wordo tuma pa mantene e confianza di bishitantenan?

12. Na cua manera tin cooperacion cu Corsou y Boneiro, y eventualmente cu otro partnernan Caribe, pa tuma medidanan di seguridad y emergencia konhuntonan?

13. Por e Prome Ministro asegura cu e Staten lo wordo informa na tempo, completamente y den forma estructural tocante menasanan di seguridad cu ta toca nos seguridad nacional y nos economia directamente?