ANALISIS |Carta di De Meza ta habri un lucha riba futuro liderazgo di AVP Parti 2

Scirbi pa Tito Laclé

Mike de Meza a scoge pa no drenta gabinete. Pero pronto e por enfrenta un decision cu tin consecuencia mucho mas grandi: vota contra HOFA y desafia rumbo di su propio coalicion, of vota na favor di un ley cu, segun su carta, ta contrario na su conviccion y autonomia di Aruba.

Prome cu e momento ey yega, Mike Eman mester yena e vacante ministerial cu De Meza a laga atras. Pero e escogencia di su reemplazo tampoco ta un asunto puramente administrativo. E persona cu Gobierno nombra lo manda un señal directo tocante rumbo di AVP, relacion cu FUTURO y espacio cu ainda tin dentro di partido pa e posicion cu De Meza ta representa.

Esey ta haci e dos preguntanan inseparabel: kende lo bira minister, y kico lo pasa ora HOFA yega Parlamento?

E PROBLEMA DI E MINISTER NOBO

Mike Eman awor mester busca un reemplazo pa un puesto ministerial importante. Pero e escogencia no ta neutral.

Si Gobierno nombra un figura cu ta fuertemente pro-HOFA, esaki por wordo interpreta como señal cu rumbo di gabinete no ta negociabel y cu posicion di De Meza ta wordo considera minoritario dentro di AVP.

Si e nombra un figura cu ta mas cerca di preocupacionnan di De Meza, e por indica cu AVP ta tratando di reequilibra su posicion interno. Esaki, na su turno, por tin consecuencia pa relacion cu FUTURO y pa manera cu coalicion ta interpreta compromiso di AVP cu HOFA.

Un tercer opcion ta pa pospone e nombramento te despues di Congreso di 4 di october. Esaki por indica cu partido kier laga su lider nobo participa den decision, especialmente considerando cu e persona ey posiblemente tambe lo mester prepara pa tuma liderazgo di Gobierno despues di salida di Eman.

Cada opcion tin peso politico. P’esey, e pregunta “ken  lo bira minister?” ya no por wordo separá for di pregunta “ken  lo bira lider?”

FUTURO TAMBE TIN UN PROBLEMA

Tin otro dimension cu AVP no por ignora: su coalicion cu FUTURO.

Noticiacla a señala anteriormente cu posicion di De Meza contra HOFA por crea tension, precisamente pasobra e ley ta forma parti di rumbo politico acordá entre AVP y FUTURO. Si AVP internamente cuminsa move den direccion di De Meza, esaki inevitablemente lo afecta relacion cu su socio di coalicion.

Si AVP, al contrario, mantene rumbo actual sin cambio, e pregunta ta con partido lo maneha su propio parlamentario ora HOFA yega Parlamento. E scenario mas sensibel ta un votacion.

Si De Meza vota contra, e diferencia di pensamento lo bira un problema concreto den aritmetica parlamentario. Si otro miembro di AVP sigui e mes rumbo, e asunto por pasa di un debate ideologico pa un problema di mayoria y stabilidad di Gobierno.

No tin base ainda pa conclui cu esaki lo pasa. Pero despues di carta di De Meza, e posibilidad tampoco por wordo descarta como puro speculacion. E ta precisamente p’esey cu FUTURO tin interes den claridad tocante ken realmente ta determina posicion di AVP: gabinete, liderazgo actual, futuro lider of fraccion parlamentario.

CONGRESO NO POR TA SOLAMENTE CEREMONIAL

E situacion no necesariamente mester termina den crisis. Diferencia interno no ta algo extraño den un partido grandi; e peligro ta aparece ora partido pretende cu e diferencia no ta existi.

Congreso di 4 di october, p’esey, por bira mucho mas importante cu inicialmente a pensa. E no por limita su mes na un ceremonia pa entrega liderazgo, cambia statutonan y presenta un directiva nobo. E mester bira e momento caminda AVP ta defini su rumbo real: con e ta mira autonomia, kico su posicion riba HOFA ta, con e kier maneha coalicion y cuanto espacio tin pa desacuerdo interno.

Si partido logra tene e debate abiertamente y yega na un posicion cu su base por comprende, e por sali mas fuerte. Si e trata di tapa e diferencia pa conserva apariencia di unidad, e riesgo ta cu e conflicto simplemente explota despues, posiblemente ora HOFA yega Parlamento.

E PREGUNTA MAS GRANDI NO TA DE MEZA

Mike de Meza ta cla den su intencionnan: e no ta sostene HOFA den su forma actual y e no kier bira minister den e gabinete actual. Pero su decision ta obliga AVP pa haci su propio escogencia.

Partido mester determina si su rumbo actual ta representa conviccion di henter e organisacion, si su lider nobo lo continua linea di Mike Eman of redefini posicion di AVP, y si e proximo Minister Presidente lo hereda e rumbo actual of traha uno propio.

Riba tur cos, AVP mester descubri si Mike de Meza ta solamente un voz disidente, of e prome persona cu publicamente a bisa loke mas hende dentro di partido ya ta pensa.

E carta a cera porta pa un minister. Pero posiblemente el a habri e debate mas importante cu AVP mester enfrenta prome cu su era despues di Mike Eman por realmente cuminsa.