Polis ta confisca arma di candela despues di persecucion na San Nicolas

SAN NICOLAS — Polis a confisca un arma di candela y un scooter despues di un persecucion di un sospechoso cu a logra hui, diadomingo anochi. Asina polis a raporta dialuna merdia. 

Pa 8:35 polis a ricibi informacion di un persona sospechoso riba scooter, cu su cara tapa, den vecindario di De Vuyst. Cerca di Lago Heights Supermarkt, un patruya a localisa un scooter cu ta cuadra cu e descripcion, pero e conductor a nega di para.

Durante e persecucion, den cercania di Mount Scenerystraat y Ronde Klipweg, e sospechoso a cay cu su scooter y a sigui hui na pia, tirando un arma di candela den mondi.

Polis a recupera e arma y confisca e scooter y otro pertenencianan. E sospechoso ainda ta fugitivo y investigacion ta continua.

Polis ta pidi testigonan pa yama 11141, completamente anonimo.