MEP duna minister Croes 48 ora pa entrega decision di LAR

ORANJESTAD – Parlamentarionan Evelyn Wever-Croes y Rocco Tjon a manda un carta formal na Minister Gerlien Croes, indicando cu e plazo legal pa tuma un decision nobo den e caso LOB relaciona cu e biahe den jet priva a pasa.

Segun nan, Comision di Obhecion di LAR a manda su conseho na minister dia 10 di juli 2026. For di e fecha ey, minister tabatin seis siman pa tuma un decision nobo, un plazo cu a termina dia 21 di augustus.

Wever-Croes y Tjon ta bisa cu te awor nan no a ricibi ni un decision nobo ni copia di e conseho di LAR. P’esey, nan ta exigi pa Croes entrega ambos documento dentro di 48 ora.

Nan ta basa nan peticion riba articulo 20 di Landsverordening administratieve rechtspraak, cu segun nan, ta obliga entrega e decision inmediatamente ora plazo legal ya a pasa.

“E plazo legal a pasa. Nos no ta pidi nada extraordinario. Nos ta pidi simplemente pa e Minister cumpli cu su obligacion legal,” nan a declara.

Si Croes no responde dentro di 48 ora, Wever-Croes y Tjon ta bisa cu nan lo considera siguiente paso legal bou di LAR.