Homber di 20 aña den estado critico despues di tiramento na Mandolinestraat

ORANJESTAD – Un homber di 20 aña a resulta gravemente herida den un tiramento cu a tuma luga diaranson alrededor di 3’or di marduga dilanti di su cas na Mandolinestraat.

Despues di ricibi e notificacion, Central di Polis a manda varios patruya y un ambulance na e sitio. Na yegada, polis a encontra e victima cu heridanan di bala y den estado critico.

Personal di ambulance a stabilisa e homber y transport’e cu maximo urgencia pa hospital. Segun Cuerpo Policial Aruba, su condicion ta critico, pero stabiel.

Recherche y Polis Tecnico a inicia un investigacion riba e caso, mientras cu Departamento di Slachtofferhulp tambe a brinda asistencia na e sitio.

Polis ta pidi tur persona cu tin informacion of cu a presencia algo pa yama Tipline na 11141. E yamada ta anonimo.