MEP y FUTURO ta exigi garantia pa autonomia di Aruba den ley di Reino

ORANJESTAD — Fraccionnan di partidonan MEP y FUTURO den Parlamento di Aruba ta pidi claridad di Gobierno di Reino tocante un proposicion di ley cu ta busca di mantene validez di varios regulacion existente despues di cambio den Statuut di Reino.

Den un informe aproba 7 di october, parlamentario Edgard Vrolijk (MEP) a presenta 20 pregunta, principalmente pa garantisa cu aprobacion di e ley no ta limita autonomia di Aruba ni ta crea precedente pa futuro leynan di consenso, particularmente den asuntonan manera supervision financiero y gubernamental.

MEP ta reconoce necesidad di evita un bacio legal despues di 31 di december 2026, pero ta exigi claridad tocante consecuencia huridico, financiero y constitucional prome cu determina su posicion definitivo.

FUTURO, di su parti, a presenta dos pregunta enfoca riba garantia cu e ley no ta crea obligacionnan nobo pa Aruba y ta proteha continuidad di regulacionnan relaciona cu seguridad maritimo, Cruz Cora y financiamiento di Ministerio Publico.