Oduber: Ta lamenta cu gobierno nobo a dobla pa por a complace RSG

ORANJESTAD – Ex minister di turismo Dangui Oduber, den un reaccion pa Noticiacla, riba e firmamento di e MoU entre gobierno di Aruba y Royal Schiphol Group (RSG) ta lamenta cu e gobierno nobo a ‘dobla’ pa complace e compania hulandes. Segun e ex minister, ta for di anja pasa e proceso di negosiacion cu RSG (Royal Schiphol Group) a cuminsa. “Semper e insteek tawata pa continua cu e relacion cu nan pero negosha un acuerdo nobo caminda RSG tambe ta tene consideracion, respeta y accepta e condicionan di Aruba” Oduber a cuminsa na bisa na noticiacla. Fin di januari di e aña aki caba, e ex minister a bisa Noticiacla caba cu tabatin problema pa complace RSG cu su condicionan. 

NUNCA A AHUSTA E CONTRACTO 

Segun Oduber, pa ta clear, nunca e contrato cu a wordo firma 20 anja pasa a wordo ahusta. E ta bisa cu, cu tempo necesidadnan di AAA a cambia cu ta pone cu mester evalua e acuerdo y a sinti cu mester hacie cierto ahustenan na e necesidadnan di awe. E situacion financiero di e compania ta stabiel, e leadership team ta consisti di profesional capacita. Tur ta local y durante añanan a crece den nan trabou como profesional. Nan tin conocemento, capacidad, experiencia y experticio. Loke nos aeropuerto tawata tin mester na asistencia 20 anja pasa awe na aña 2025 ta totalmente diferente. 

NO A TENE CUENTA CU CONDICION DI ARUBA

Oduber ta sigui bisa cu no por ta asina cu ta drenta un proceso di negosiacion y solamente mester accepta condicionan di RSG sin tene cuenta cu condicionan di Aruba. “ Esey no ta un negociacion sino mas bien e ta un estilo di impone condicionan y si no accepta mi ta bai”.

UN LOCAL NA CABEZ DI AEROPUERTO 

“ Un di e condicionan cu nos a drenta e proceso di negosacion cune ta cu despues di 20 anja a yega e momento pa cumpli cu e acuerdo pa nos aeropuerto wordo maneha pa un profesional local. Den e acuerdo ta stipula cu RSG lo mester a prepara y leid op un yiu di tera pa bira CEO cual nunca a sosode” Oduber a sigui bisa. “ Bo kier bisami cu den transcurso di 20 anja Schiphol no por a cumpli cu e acuerdo pa prepara un yiu di tera pa asumi e rol di CEO di aeropuerto?? Mi ta kere gobiernonan a duna suficiente tempo y espacio na Schiphol pa cumpli cu e acuerdo cual no a pasa”. 

SOLICITUD HABRI

RSG den nan 20 anjanan cu nan tawata tin aki nan nunca a tene un proceso habri di solicitud caminda profesional local tambe por a participa. “Despues di hopi insistencia di nos banda a logra pa habri e solicitud pa localnan tambe por participa pa promer biaha.

Semper nan manera tawata di simplemente informa shareholder kende ta bira e siguente CEO”. E biaha aki door di insistencia e proceso tawata diferente y di e forma aki nan a habri e proceso di solicitud pa localnan tambe por a participa. “Tin por lo menos 3 profesional local cu mi sa sigur cu a participa den e proceso cu ta fit e “profielschets” y cu ta apto pa ta e CEO di aeropuerto” Oduber a sigui bisa.

RSG a traha un shortlist di candidato y e unico candidatonan cu e keda tawata 2 persona di afor. “ Aki nan ta caminda e “impasse” a cuminsa pasobra nos a sinti cu nan no kier accepta nos condicion y nombra un CEO local!” Oduber a continua bisando. 

LNT TA PROBLEMA

Banda di esaki nan a pidi excepcion riba e LNT. “Nos a splicanan cu si haci excepcion pa AAA cual nos tawata considerando pa haci, lo mester haci excpecion pa tur otro compania estatal. Conseho di minister a pidi un conseho y esaki a bin negativo” Oduber a bisa.

GOBIERNO NOBO A DOBLA 

“Loke mi ta lamenta ta e hecho cu den apenas algun ora e gobierno nobo aki a “dobla” y bai di acuerdo cu tur condicionan di Schiphol sin cu nan ta tene cuenta cu e condicionan cu nos a pone.  Nos a para firme, fuerte y duro pa despues di 20 aña porfin un profesional local por lidera y maneha nos aeropuerto pa mira awe con ministernan Eman, Cecilia y Wever ta doblega asina liher faltando respet na nos profesional local, menospreciando nan y un biaha mas desconfiando den nos propio capacidad. Bisando cu nos no tin e capacidad intelectual pa maneha e complexidad ta un falta di respet pa tur local!” Oduber a finalisa bisando.