Condicionan di Royal Schiphol Group ta bay hopi leu y ta dificil pa cumpli cu ne

ORANJESTAD –  “ Nos ta sinti cu condicionan di Schiphol ta bai hopi leu y dificil pa cumpli cu tur nan condicionanan. Nos a yega na un situacion delicado pero naturalmente nos ta habri pa sigui papia as long cu ta tene consideracion cu nos condicionan”. Asina e minister demisionario encarga cu aeropuerto Dangui Oduber a bisa Noticiacla riba e tema di contracto cu Royal Schiphol Group, e compania cu ta manehando aeropuerto pa 10 aña caba.  “Si no logra yega na un acuerdo e contrato ta termina den luna di juli 2025” e mandatario a sigui bisa. 

COMIENSO DI SCHIPHOL GROUP NA ARUBA

Tabata na 2004 cu Schiphol Group, cu despues a bira Royal Schiphol Group a yega Aruba, cu intermediacion di e tempo ey, prome minister Nelson Oduber. E prome CEO apunta, tabata Peter Steinmetz, cu ta esun cu a keda mas largo di e tres CEO' nan cu tabata na cabez. E la keda pa un periodo di 10 aña. E fee cu mester a paga Schiphol Group e tempo ey tabata 4 pa 5 miyon florin pa aña. Esaki den curso di 20 aña a aumenta te na 7 miyon. Otro CEO nan tabata James Fazio cu a keda entre 4 pa 5 aña y despues Joost Meijs cu tambe a keda 5 aña. Pa algun luna caba (desde juli di aña pasa) no tin un CEO na cabez mas di RSG, sino un management team di tres yiu di tera.   

PREPARA YIU DI TERA

Segun Oduber, Royal Schiphol Group mester a prepara un yiu di tera pa dirigi aeropuerto y no a haci esaki. Esaki ta un di e problemanan mas grandi segun Oduber a bisa Noticiacla diamars. E contracto mester keda renoba pero esaki no ta cla ainda segun Oduber. 

AÑA PASA

Segun Oduber, ta for di aña pasa partidonan a cuminsa e proceso di negociacion. Tin cu tene na cuenta cu e contrato cu Royal Schiphol Group ta termina y pesey a tuma contacto cu Royal Schiphol Group pa cuminsa discuti diferente puntonan di e acuerdo. 

PUNTO DI SALIDA 

E punto di salida principal di Aruba segun Oduber, tabata cu despues di 20 aña di acuerdo cu Royal Schiphol Group, a yega e momento pa Aruba mes tin su yiu di tera como CEO. “ As a matter of fact, den e acuerdo ta poni cu nan obligacion tawata pa durante e añanan cu nan tey, nan prepara un yiu di tera pa e funcion di CEO cual nunca nan a haci” e la bisa. “Nos ta agradecido sigur pa tur locual Schiphol a haci pa nos aeropuerto y nos a drenta den negociacionan cu tur intencion pa yega na un acuerdo cu ambos partido ta accepta”. 

TUR COMPANIA LOCAL TIN LOCAL NA CABEZ

Tur compania estatal na Aruba ta wordo maneha pa un yiu di tera cu excepcion di AAA NV segun Oduber. Henter e leadership team cu ta encarga cu maneho di aeropuerto ta consisti di yiunan di tera cu a sa di maneha cu hopi exito. “Awor pakiko despues di 20 aña di acuerdo Schiphol no ta reconoce nos yiunan di tera y brinda nan e oportunidad pa maneha nos aeropuerto?” e mandatario ta puntra. “Nos semper ta keda habri pa continua cu e combersacionan cu Royal Schiphol Group manteniendo nos principio cu nos kier nos yiu di tera como CEO”, e mandatario ta finalisa bisando.