Gobierno a concede tur exigencia di Royal Schiphol Group y a firma un MoU

ORANJESTAD – Gobierno di Aruba y Royal Schiphol Group a firma un Memorandum of Understanding (MoU) diahuebs atardi, pa asina garantisa un continuidad di e grupo, cu for di 2004 ta manehando nos aeropuerto Reina Beatrix. Prome minister Mike Eman a confirma cu tur e puntonan di conflicto cu a pone cu a surgi un impasse na December cu e gabinete anterior, a keda resolvi y concede. 

KICO A CONCEDE NA RSG

Entre nan, cu a priminti RSG cu lo busca un forma pa ‘evita’ cu e ley di LNT ta conta pa nan tambe, y cu RSG ta haya un miembro den e Hunta di Comisario di AAA. Lo sigui busca un local pa bira CEO, pero esey no ta un obligacion, y tampoco un punto di kiebro segun Eman. Pa Gobierno a firma ministernan Mike Eman, Wendrick Cicilia y Geoffrey Wever, y pa Royal Schiphol Group a firma Kjell Kloosterziel cu for di januari di e aña aki a bira e director pa asuntonan internacional. 

ACUERDO DEN LIÑA GRANDI

Sr Eman a admiti na Noticiacla cu diaranson apenas a papia cu e directiva y e hunta di Comisario riba e tema y cu a haya feedback necesario. Alavez sr Eman a sigura na Noticiacla cu a cana e caminda corecto pa yega na e punto aki y a stipula e puntonan strategico aki cu e accionista tin derecho pa trece dilanti den liñanan grandi. Y esey a comunica na e directiva y e hunta di Comisario (RvC).  E pregunta a bin pasobra a compronde cu tanto directiva como RvC a haya un sorpesa di e intencion pa un MoU, y cu no tabata na altura di esaki sino a bin tende di esaki den medionan di comunicacion. 

Segun sr Eman, despues cu a firma e MoU, diabierna e directiva di AAA lo sigui negosha hunto cu RSG pa traha riba e detayenan di e acuerdo. Importante pa gobierno, como e accionista unico di aeropuerto, cu a cumpli cu tur e loke cu RSG a pidi pa por a sigui cu e relacion, mientras cu e detayenan completo, ta bin aworaki. 

RSG HOPI CONTENTO 

Segun Kloosterziel, RSG ta hopi contento pa por a continua e cooperacion di 20 aña cu Aruba, y hunto por sigui traha pa e exito di e aeropuerto. Kloosterziel a haye hopi remarkable cu asina lihe despues cu e gabinete nobo a cuminsa traha, cu a cuminsa negosha pa prolonga e acuerdo strategico. 

LNT

Pa loke ta e LNT, e ley cu ta sigura cu tin limitacion pa e salario di un ehecutivo, esta e Landsverordening Normering Topinkomens (LNT), minister Geoffrey Wever a sigura Noticiacla cu ta bay busca un forma pa haci un excepcion pa AAA y RSG, pa nan no cay bou di e ley aki. Riba e pregunta di noticiacla, cu si esaki no ta causa un precedente y cu djisaki tur otro instancia y departamento y compania afecta, ta bay bringa pa nan tambe haya e trato aki, sr Wever a sigura cu cada caso ta uno riba su mes y no ta algo automatico cu ta sosode. 

COBRANSA SIN TRAHA

Riba e pregunta di noticiacla, kico ta pasa cu e 10 lunanan cu e contracto di RSG a sigui core, sin cu tabatin un CEO di nan na cabez, sr Eman a bisa cu esey ta un pregunta pa directiva contesta y no ta uno cu ta pa Gobierno contesta.