Gobierno a bay di presupuesto balansa pa uno cu surplus den un siman!

ORANJESTAD – Despues di a bisa apenas algun dia pasa cu no ta logra un surplus pa e presupuesto di 2023, diabierna durante tratamento di presupuesto 2023, minister di finanza Xiomara Maduro a sorprende tur hende cu e anuncio cu ‘a logra reduci e deficit ocasiona pa e pandemia y cu ta yega atrobe na un surplus pa Aruba”. Cu esaki, nan ta ‘cumpli’ cu e norma stipula cu Hulanda, evitando mas problema den 2023. NoticiaCla no a mira e cambionan pa husga esaki independientemente. Ademas, CAFt tin cu wak e presupuesto unabez cu e ta aproba pa Parlamento, pa asina e duna su ‘veredicto’ final. No ta conoci si gobierno a usa metodonan structural pa yega na e surplus, of manera den pasado recien, a usa ‘meevallers’ pa logra esaki. 

SURPLUS NA AÑA 2019

Minister Maduro a recorda cu tabata na fin di 2019 a yega un surplus chikito di 4 miyon florin. Segun informacion difundi pa e mandatario, pa aña 2023 Gabinete Wever-Croes ta presenta un presupuesto cu un deficit di 25 miyon florin y awo ta logra pa cambia esaki pa un surplus di 63 miyon florin.

PRESUPUESTOTabata apenas comienso di e luna aki cu e mesun minister a anuncia cu mientras cu no ta logra un presupuesto cu deficit, Aruba lo por presenta un presupuesto balansa si, y si cos bay bon, porta pa fin di aña por logra un surplus. Awor ta mustra cu a haci trabounan extra cu a logra cu ta haya e deficit cambia den un surplus. Pero manera a bisa anteriormente, ta spera cu a usa cambionan structural pa genera e surplus y no ‘meevallers’.