Maduro: Envez di surplus, por logra presupuesto balansa pa 2023

ORANJESTAD – Mientras cu e colegio di supervision financiero pa Aruba CAFt a exigi pa segun norma pa 2023, Aruba presenta un presupuesto cu surplus di 1%, gobierno di Aruba a bisa cu awor ta mustra cu lo no logra esaki sino te final di e aña. Pero cu si ta mustra cu por tin un presupuesto balansa. Asina e minister responsabel pa finanzas Xiomara Maduro a bisa e colegio recientemente. NoticiaCla no a mira e presupuesto  pues no por a husga esaki independientemente.

PRESUPUESTO 2023 TA CLA PA WORDO TRATA

Minister Maduro a informa CAFT cu Presupuesto 2023 a keda entrega na tempo y ta cla pa wordo trata pa Parlamento. Segun e mandatario, a presenta un concepto cu un deficit di 25 miyon florin, pero e mandatario a informa cu Gobierno lo presenta un 'Nota di Cambio' cu ta reduci e deficit aki mas y cu kizas lo por yega na un presupuesto balansa pa aña 2023. “Depende con economia bay otro aña, lo por spera hasta un surplus chikito na fin di aña 2023” e mandatario a bisa. No ta conoci si CAFt ta OK cu e punto aki.