Aruba ta registra su di 16 morto di trafico pa aña 2026

Aruba ta registra su di 16 morto di trafico pa aña 2026

Posted on 11/16/2026, 5:53 AM AST | Updated on 11/16/2026, 5:54 AM AST

ORANJESTAD — Aruba a registra su di 16 morto den trafico pa aña 2026, despues cu un hende muher di 45 aña a perde su bida diadomingo anochi den un accidente tragico na altura di Rey Hing na Pos Chiquito.

Pa mas o menos 10:32 di anochi, Central di Polis a ricibi notificacion cu un auto lo a pasa riba un persona cu tabata drumi riba caminda. Patruya policial y ambulance a wordo despacha inmediatamente na e sitio.

Segun informacion preliminar, e victima lo a cay riba caminda pa motibonan ainda desconoci. Un prome automobilista aparentemente a logra evita di dal e hende muher, pero un segundo auto cu tabata bin atras lo a pasa riba dje.

Personal di ambulance a duna e victima asistencia medico na e sitio y a transporte cu maximo urgencia pa hospital. Lamentablemente, pa 11:33 di anochi, dokter a constata fayecimento di Nilienne Rhulayma Mariana Donata, naci na Aruba dia 27 di juni 1981, di 45 aña.

Specialistanan di trafico y polis tecnico a presenta na e sitio pa investiga e circunstancianan di e accidente. Departamento di Slachtofferhulp tambe a brinda asistencia na famia di e fayecido.

 Cuerpo Policial Aruba ta extende su condolencianan na famia y sernan keri di e victima.