Foyer di Cas di Cultura ta haya nomber di Maybelline Arends-Croes

Foyer di Cas di Cultura ta haya nomber di Maybelline Arends-Croes

Posted on 11/16/2026, 6:26 AM AST | Updated on 11/16/2026, 6:27 AM AST

ORANJESTAD — Cas di Cultura y Aruba Tourism Authority (A.T.A.) a anuncia cu e foyer di teatro nacional lo carga e nomber di Maybelline Arends-Croes, como reconocemento pa su contribucion durante decenianan na desaroyo musical y cultural di Aruba. E anuncio a tuma luga diasabra 14 di november, durante e mediathon “E Brasa”, organisa pa recauda fondo pa renovacion y ampliacion di Cas di Cultura.

E iniciativa ta forma parti di un proyecto mas amplio pa modernisa e teatro nacional. Na november 2025, CEO di A.T.A., Ronella Croes, a anuncia un aporte di Afl. 1 miyon pa e proyecto, cu ta forma parti di e vision di turismo cultural y preservacion di patrimonio Arubiano.

Maybelline Arends-Croes, conoci como “Maybe”, a nace na Aruba dia 27 di maart 1945. Despues di studia musica na Conservatorio di Hilversum na Hulanda, el a dedica 40 aña na enseñansa musical na Colegio Arubano, di 1968 te 2008. Tambe el a prepara generacionnan di cantante, musico y coro pa festivalnan y produccionnan cultural.

Entre su contribucionnan ta su participacion den e comision di himno nacional di Aruba na 1976, su trabou cu gruponan vocal manera Tutti Frutti y Mélange, y su direccion di produccionnan musical pa TeleAruba y Cas di Cultura.

Na november 2022, el a ricibi e premio nacional Crioyo di Oro pa su aporte excepcional na cultura Arubiano.

E anuncio a coincidi cu celebracion di 68 aña di Cas di Cultura, inaugura dia 15 di november 1958. Cu e dedicacion di e foyer, e teatro ta honra un figura cu a contribui directamente na formacion musical y cultural di diferente generacion na Aruba.