Por lo menos 22 vuelo cancela na Aruba durante fin di siman

Por lo menos 22 vuelo cancela na Aruba durante fin di siman

Posted on 11/16/2026, 6:39 AM AST | Updated on 11/16/2026, 6:39 AM AST

ORANJESTAD — E problema tecnico cu a paralisa trafico aereo na Merca diabierna 13 di november a afecta operacionnan di Aeropuerto Internacional Reina Beatrix durante fin di siman, cu por lo menos 22 cancelacion di vuelo identifica den datonan di diferente fuente, tanto di yegada como di salida.

Un revision preliminar di informacion di Aruba Airport Authority (AAA) y e plataforma independiente AeroCorner ta indica cu diasabra 14 di november so a registra 13 cancelacion di vuelo di salida, segun e estadisticanan di AeroCorner.

Ademas, den e informacion di vuelo publica pa aeropuerto di Aruba, por identifica por lo menos shete vuelo di yegada cancela durante diasabra y diadomingo, principalmente di JetBlue procedente di New York y Boston. Pa diadomingo, por identifica tambe por lo menos dos vuelo di salida pa Boston cu a wordo cancela.

E cifranan aki ta representa cancelacionnan identifica den e informacion disponibel, pero ainda no ta un balance oficial y completo di AAA. Tampoco no ta confirma cu tur e cancelacionnan tabata consecuencia directo di e problema na Estados Unidos.

PROBLEMA TECNICO NA MERCA

Diabierna atardi, Federal Aviation Administration (FAA) a ordena un suspension nacional di despegue di avionnan na Estados Unidos, despues cu un problema den sistema di telecomunicacion a afecta comunicacion y informacion di radar di control aereo.

E medida a drenta na vigor pa mas o menos 3:30 di atardi, ora di costa este di Merca, y a wordo kita pa 8:15 di anochi. Sinembargo, consecuencia di e interrupcion a sigui afecta operacionnan durante diasabra y diadomingo.

AAA a emiti un advertencia diabierna, indicando cu vuelonan entre Aruba y Estados Unidos por a sufri atraso, cambio di horario of cancelacion. Aeropuerto di Aruba mes a sigui operacional.

IMPACTO A SIGUI DURANTE FIN DI SIMAN

E cancelacionnan identifica ta confirma cu efecto di e problema no a limita su mes na diabierna. Diadomingo ainda tabatin vuelo di JetBlue cancela entre Aruba, Boston y New York, mientras cu otro vuelo a registra cambio di horario y atraso.

E situacion ta ilustra con dependiente conectividad aereo di Aruba ta di operacionnan internacional, particularmente di Estados Unidos, uno di e mercadonan principal di turismo pa nos isla.

Na nivel di Merca, FAA a reporta cu aproximadamente 12.462 vuelo a wordo cancela diabierna, aunke e agencia a aclara cu no tur cancelacion tabata directamente relaciona cu e suspension nacional.

Pa Aruba, ainda falta un informe final di AAA cu ta detaya e cantidad exacto di vuelo cancela entre diabierna 13 y diadomingo 15 di november, separa entre yegada y salida, y e motibo di cada cancelacion. NOTA: e potret ta uno generico.