SITA ta destaca Aruba como lider regional den tecnologia aeroportuario y control fronteriso

ORANJESTAD — Aruba ta posiciona su mes como un di e paisnan mas avansa den region den uso di tecnologia moderno pa aviacion y control fronteriso, segun George Miley, vicepresidente di SITA pa America Latina y Caribe.

Durante un entrevista cu CNN Negocio, Miley a destaca e cooperacion entre Gobierno di Aruba, Inmigracion Aruba y SITA, cu a contribui na modernisacion di procesonan na Aeropuerto Internacional Reina Beatrix.

E tecnologia ta enfoca riba eficiencia, siguridad y un miho experiencia pa pasaheronan, mientras cu e ta fortalece capacidad di autoridadnan pa control fronteriso.

Recientemente, SITA a organisa un forum internacional na Aruba, durante cual representantenan di diferente pais a haya oportunidad di conoce e sistemanan moderno implementa na aeropuerto.

Aruba a ricibi tambe e Reconnaissance High Security Printing Latin America Award durante un evento na Guatemala.

Minister di Husticia Arthur Dowers ta considera modernisacion tecnologico esencial pa fortalece siguridad fronteriso. Segun e informacion presenta, e cooperacion cu SITA lo continua cu implementacion di solucionnan tecnologico nobo.