App nobo Unda ta permiti consumidor compara prijs di supermercado na Aruba

ORANJESTAD — Un aplicacion nobo cu yama Unda a wordo lansa na Aruba, cu e obhetivo di yuda consumidor compara prijsnan di producto na diferente supermercado y haci compras mas economico.

Cu e app, usuarionan por scan e barcode di un producto of busc'e directamente pa mira e ultimo prijsnan registra na diferente supermercado. Tambe nan por crea un lista di compras (shopping list) y compara na cua supermercado e lista completo lo costa menos, segun e informacion disponibel.

E iniciativa ta busca pa duna famianan mas control riba nan gastonan, particularmente den un temporada cu costo di bida ta un preocupacion importante.

Unda ta funciona tambe cu participacion di comunidad. Usuarionan por agrega producto, registra prijs nobo y actualisa informacion existente. Sinembargo, e prijsnan presenta no necesariamente ta e prijs actual na momento di compra, debi na cambionan den supermercado.

E ekipo tras di Unda ta aspira pa amplia e plataforma cu mas producto y supermercado, y ta considera cooperacion cu e establecimentonan comercial importante pa mehora calidad di informacion.

E aplicacion ta disponibel via unda.cheap.