Respaldo, Polis y Ambulance ta firma acuerdo pa maneho di crisis psikiatrico

ORANJESTAD — FSMA Respaldo, Cuerpo Policial Aruba (KPA) y Ambulancedienst di ImSan a firma un convenio di cooperacion diamars 3 november 2026, pa mehora coordinacion, siguridad y cuido di personanan den situacionnan di crisis psikiatrico.

E acuerdo ta defini claramente responsabilidad di cada organisacion. Respaldo ta encarga cu evaluacion, tratamento y eventual admision psikiatrico, mientras cu Polis ta responsabel pa orden publico y siguridad. Ambulancedienst di ImSan ta encarga principalmente cu transporte medico di pashentnan y asistencia medico urgente.

Segun e convenio, agentenan policial y personal di ambulance por comunica directamente cu Crisisdienst di Respaldo, cu ta disponibel 24 ora pa dia pa referidonan autorisa.

Un cambio importante ta cu transporte di personanan den crisis psikiatrico, en principio, mester sosode cu ambulance. Uso di vehiculo policial lo ta permiti solamente den situacionnan excepcional y bao condicionnan specifico.

E tres organisacionnan lo evalua nan cooperacion mensualmente durante e prome aña, pa identifica problemanan y introduci mehoracionnan.

Directora di Respaldo C.J. Hart, hefe di Polis Ramon Arnhem y representantenan di ImSan a destaca cu e acuerdo ta contribui na un maneho mas profesional, sigur y humano di personanan cu ta enfrenta crisis psikiatrico.

E convenio a drenta na vigor mesora despues di su firmamento.