Horacio Oduber Hospital ta ricibi 15 miyon di AZV, pero ta adverti pa posible crisis financiero na december

ORANJESTAD —   (HOH) a informa cu nan a ricibi un pago parcial di 15 miyon florin di AZV pa cuido brinda durante 2025. E suma ta ofrece un alivio financiero temporal, pero hospital ta adverti cu e problema structural di financiamiento ainda no ta soluciona.

Segun HOH, e pago no ta un aumento di presupuesto, sino compensacion pa cuido cu hospital a brinda caba. Cu e placa aki, hospital por cumpli cu su obligacionnan pa algun siman, sin necesidad di limita operacionnan of tratamentonan planea.

Sinembargo, HOH ta preocupa cu AZV kier cuminsa desconta adelantonan anterior for di e pagonan regular na december, locual por provoca un deficit financiero nobo y pone continuidad di cuido bao presion.

HOH ta aclarea cu e 31 miyon florin cu AZV a menciona como adelanto adicional, en realidad ta forma parti di e presupuesto existente. Un investigacion externo, inicia pa AZV, ta indica preliminarmente cu financiamiento di hospital no ta refleha suficientemente e gastonan real, incluyendo inflacion y aumento di demanda pa cuido.

Hospital ta sigui negociando cu AZV y Gobierno pa un solucion duradero. Tambe mester yega na acuerdonan pa 2027 tocante presupuesto, cantidad y calidad di cuido.

HOH ta enfatisa cu sin un solucion structural, e riesgo di restriccionnan den servicio medico por bolbe surgi na december.