Minister Dowers ta instala comision pa atende problema di cachonan riba caya na Aruba

ORANJESTAD — Minister di Husticia Arthur Dowers a instala e Commissie Hondenproblematiek Aruba oficialmente diaranson, cu tin como tarea pa desaroya solucionnan concreto y duradero pa problema di cachonan sin doño y cachonan cu tin doño, pero cu ta cana liber riba caya.

Segun Dowers, e situacion ta representa un riesgo pa seguridad publico y bienestar di animalnan. Entre e problemanan tin incidente di mordemento, peliger den trafico y inconveniencia pa comunidad.

E comision a reuni representante di Directie Volksgezondheid (DVG), Cuerpo Policial Aruba (KPA), Animal Welfare Alliance Aruba, Luna Foundation, Animal Care Clinic, Bureau City Inspector (BCI) y experto den comportamento di cacho Tito Laclé.

Anke van Dijk di Bureau di Minister di Husticia ta presidi e comision, cu ta ricibi sosten huridico y administrativo di mr. Rasheema Orie.

E meta ta pa desaroya un plan structural cu ta atende no solamente e consecuencianan, sino principalmente e causanan di e problema, reduci cantidad di cachonan riba caya y promove responsabilidad di doñonan.

Dowers a enfatisa cu cooperacion entre Gobierno, organisacionnan di bienestar animal y expertonan ta esencial pa logra un solucion sostenibel.