Ley nobo ta propone Afl. 500 mensual pa mucha cu necesidad intensivo di cuido

ORANJESTAD — Un proposicion di ley actualmente na Parlamento di Aruba ta contempla un sosten financiero di Afl. 500 mensual pa cada mucha cu necesidad intensivo di cuido, cu e intencion pa implementa e medida na januari 2027, dependiendo di aprobacion parlamentario.

Durante un sesion informativo na YMCA San Nicolas, Chanin Boekhoudt di Departamento di Asunto Social y Wiebren van Dijk di Landspakket Aruba a splica e criterianan y procedimiento pa solicita e asistencia.

Un punto importante ta cu e ley no ta limita su aplicacion na un enfermedad of discapacidad specifico. E criterio principal ta e intensidad di cuido adicional cu e mucha mester den su bida diario, compara cu muchanan sin e limitacion.

E propuesta ta busca yena un bacio den legislacion actual, ya cu asistencia financiero pa personanan cu discapacidad ta disponibel for di 16 aña, mientras cu muchanan mas hoben cu necesidad intensivo di cuido no ta bin na remarca.

Segun estimacion preliminar basa riba cifranan di CBS, aproximadamente 400 mucha por ta relevante pa e iniciativa, pero e cantidad cu efectivamente lo bin na remarca ainda no ta conoci.

E sesion informativo tambe a sirbi pa evalua formularionan di solicitud hunto cu mayornan.

E ley ainda mester wordo aproba pa Parlamento. Solamente despues di aprobacion y preparacion di e reglanan di implementacion, mayornan por cuminsa presenta solicitudnan oficialmente.