KLM ta elimina 5.000 puesto di trabou pa reduci gasto y sigura su futuro

DEN HAAG — Compañia aereo KLM a anuncia cu lo elimina 5.000 puesto di trabou, casi 15% di su personal, como parti di un reorganisacion drastico pa reduci gasto y mehora su situacion financiero.

Directora general Marjan Rintel a adverti cu sobrevivencia di KLM no ta algo garantisa, considerando e presion di prijsnan halto di combustible, instabilidad internacional y aumento di gastonan operacional.

KLM ta spera di reduci personal principalmente mediante retiro boluntario y door di no reemplasa empleadonan cu ta sali. E compañia tambe lo externalisa parti di su operacion di bagage y servicio na tera, digitalisa servicio na cliente y aumenta productividad di tripulacionnan.

E meta ta pa logra un mehoramento financiero structural di €1 biyon pa aña, necesario pa inversionnan futuro. KLM tambe a dicidi di cancela plannan pa cumpra avionnan Airbus nobo.

Sindicatonan CNV y FNV a expresa preocupacion grandi tocante consecuencia pa empleadonan y condicionnan laboral. Sindicato De Unie a reacciona mas positivamente, destacando cu no ta contempla retiro forsa. KLM kier negocia cu sindicatoman riba medidanan pa aumenta productividad te 2028.