Turista Colombiano cu infeccion grave na Aruba a keda cu debe miyonario

ORANJESTAD — Un turista Colombiano di 68 aña, Ignacia Rodríguez Polo, a logra regresa Barranquilla despues di pasa mas di 40 dia den Unidad di Cuido Intensivo (ICU) na Aruba, caminda el a wordo trata pa un infeccion bacteriano grave. Segun Noticias RCN, e señora a bira gravemente malo durante su vakantie na Aruba. Sin seguro medico internacional, su famia a enfrenta gastonan considerable pa su tratamento y transporte.

Su yiu, Mario Rosales, a logra reuni USD 16.500 mediante donacionnan y recursonan propio pa paga un avion ambulancia cu a transporta su mama pa Colombia. Actualmente e señora ta ricibi tratamento den ICU na Barranquilla, bao cobertura di EPS Sura.

Sinembargo, e famia a keda cu un debe hospitalario di 1.600 miyon peso Colombiano, aproximadamente USD 430.000, relaciona cu e tratamento medico na Aruba.

E famia ta pidi yudansa pa cubri e debe mientras cu Ignacia ta sigui luchando pa recupera su salud.