Polis a detene dos homber durante accion peligroso na Caya Sint Maarten

ORANJESTAD — Polis di K-9 Unit a enfrenta un situacion peligroso diamars mainta durante detencion di un sospechoso busca pa husticia na Caya Sint Maarten.

Segun Cuerpo Policial Aruba, e sospechoso, cu tabata carga un arma di candela, a resisti fuertemente contra su detencion y no kier a coopera cu e agentenan.

E situacion a bira mas tenso ora un grupo di persona a cuminsa reuni rond di e polisnan, aparentemente cu intencionnan poco amistoso. Mirando e peliger, polis a los tironan di advertencia pa controla e situacion.

Despues di e tironan, e situacion a calma y polis a logra pone e sospechoso den boei. Diferente unidad policial a yega na e sitio pa duna refuerso.

Durante e mesun operacion, polis a detene un di dos homber cu tambe tabata busca pa husticia y cu tabata presente na e luga.

Cuerpo Policial Aruba ta reafirma su compromiso pa combati presencia di arma di candela ilegal riba caya y ta pidi ciudadanonan cu tin informacion pa yama tipline 11141.