Aruba mas cerca di importa carni for di Colombia

ORANJESTAD — Aruba a logra un avance den su esfuerzonan pa importa carni directamente for di Colombia, despues cu Minister di Salubridad Mervin Wyatt-Ras y Minister Boekhoudt di Corsou a firma un acuerdo di cooperacion (MOU).

E iniciativa a cuminsa na 2023, bao liderazgo di Minister Geoffrey Wever, cu na e tempo ey a encabesa un mision comercial na Colombia pa explora posibilidadnan di importa carni di calidad na prijsnan mas economico.

Segun Wever, e acuerdo cu Corsou ta un paso importante pa amplia e mercadonan di importacion, aumenta competencia y eventualmente baha prijs di carni pa e consumidor Arubiano.

Sinembargo, importacion ainda no por cuminsa. Prome mester finalisa e proceduranan huridico y sanitario, y firma un acuerdo cu autoridadnan Colombiano.

Wever ta spera cu e pasonan restante por wordo completa den algun luna, permitiendo cu importadornan local por beneficia di e mercado nobo.