Minister Dowers ta intensifica limpiesa y orden publico den centro di Oranjestad

ORANJESTAD — Minister di Husticia Arthur Dowers a bishita diferente punto den centro di Oranjestad pa evalua e trabounan di limpiesa y accionnan pa mehora orden publico y seguridad.

Atencion special a bay pa cercania di Corte y establecimentonan comercial, caminda acumulacion di sushi y uzo inapropia di espacionan publico ta causa preocupacion entre comerciante y habitante.

Gobierno ta busca evita cu e problemanan bolbe presenta despues di limpiesa. E acercamento ta inclui tambe atencion pa personanan vulnerabel cu ta enfrenta problema di adiccion of salud mental.

Segun Dowers, e meta ta pa logra un centro di ciudad mas limpi, seguro y ordena, cu accionnan continuo en bes di intervencionnan incidental.