Ombudsman preocupa pa seguridad y cuido den institucionnan priva na Aruba

ORANJESTAD — Ombudsman Jurima Bryson a expresa preocupacion tocante seguridad, proteccion y calidad di cuido den institucionnan priva cu ta hospeda adulto mayor, personanan sin hogar y personanan cu problema di adiccion.

Despues di ricibi varios melding y observa publicacionnan den prensa, Ombudsman a manda un carta na minister M.G. Wyatt-Ras, solicitando atencion pa e situacion di e habitantenan vulnerabel cu ta depende di e institucionnan aki.

Bryson ta enfatisa necesidad di personal capacita, supervision adecuado, cumplimento di normanan y mecanismonan accesibel pa reporta posibel abuso of iregularidad.

Segun Ombudsman, gobierno tin responsabilidad di garantisa cu e personanan aki ta ricibi cuido digno, sigur y humano.