Coremento duro di auto ta sali caro: 100 multa durante control di trafico

ORANJESTAD — Polis di Oranjestad a reparti 100 multa durante control di trafico diaranson 7 di october, di cual 64 tabata pa surpasa e velocidad maximo permiti.

E controlnan a tuma lugar na Avenida Watty Vos, cerca di rotondo di Bushiri, y na altura di A.P.A., cu participacion di Unidad Motorisa, D.T.P. y CEA.

E otro multanan tabata pa infraccion relaciona cu rijbewijs, seguro, impuesto di vehiculo y keuringskaart. Tambe a detene un persona pa falta di documento di estadia.

Cuerpo Policial di Aruba ta anuncia cu e controlnan lo continua y ta urgi automobilistanan pa respeta e limite di velocidad, evita uzo di celular durante stuurmento y nunca stuur bao influencia di alcohol.