Ramon Mas nombra Managing Director nobo di Aruba Bank

ORANJESTAD — Aruba Bank a anuncia nombramento di Ramon Mas como Managing Director, entrante 1 di november 2026. Mas actualmente ta Head of Corporate & Platinum Banking and KYC.

E cambio den liderazgo ta yama atencion pasobra e actual Managing Director, Rob Ridder, a wordo nombra den e posicion aki apenas poco mas cu un aña pasa, entrante 1 di augustus 2025. Aruba Bank no a inclui den e anuncio nobo mas detaye tocante e circunstancianan alrededor di e cambio di Managing Director y pregunta aki no a haya contesta ainda di parti di e banco, riba peticion di noticiacla.

Mas tin mas di 25 aña di experiencia den sector bancario, incluyendo corporate banking, riesgo di credito, personal banking, asunto regulatorio y liderazgo ejecutivo. Desde cu e a drenta Aruba Bank na 2013, e a ocupa varios posicion importante y a contribui na fortalecemento di actividadnan bancario pa empresanan, calidad di cartera di credito y relacionnan cu comunidad empresarial di Aruba.

Promer cu su periodo na Aruba Bank, Mas a construi un carrera bancario internacional na Spaña y Belgica. Aya e a acumula experiencia den corporate banking, credit risk, cash management, trade finance y maneho di relacionnan cu clientenan empresarial, incluyendo companianan mediano y multinacional.

Mas a declara cu Aruba ta su cas pa hopi aña y cu e ta orguyoso di asumi e funcion nobo. Segun  e, su enfoque lo ta riba un banco cu ta cerca di su clientenan, cu ta tuma decisionnan solido y cu ta comprometi cu bienestar di largo plazo di Aruba.

Como Managing Director, Mas lo traha hunto cu e otro miembronan di directiva pa sigui desaroya prioridadnan strategico di Aruba Bank, stimula innovacion y pone atencion special na clientenan, empleadonan y desaroyo economico di Aruba.