Analisis: Cicilia ta asumi liderazgo di AVP, pero e por bira lider riba su propio pia?

Scirbi pa Tito Laclé

Loke durante algun tempo tabata mustra como un posibilidad, awor a bira realidad: Mike Eman lo entrega liderazgo di AVP na Wendrick Cicilia durante Congreso di partido dia 4 di october proximo. Eman mes a confirma publicamente dialuna cu e ta entrega e liderazgo na Cicilia.

E traspaso ta genera un pregunta mucho mas grandi cu simplemente ken ta bira lider di AVP: I si, e pregunta cu mi ta tende mas hopi ta esaki: Wendrick Cicilia ta cla pa carga e peso politico di un di e partidonan mas grandi y historico di Aruba?

E pregunta ta valido, pero djis e idea cu Cicilia no tin ningun experiencia NO ta completamente corecto. No. Durante eleccion di 2024 Mike Eman a pasa e posicion di lijsttrekker (nr. 1) pa Cicilia, mientras Eman mes a ocupa posicion di lijstduwer (nr. 29). AVP a gana e eleccion cu Cicilia na cabez di e lista y como di dos vote-getter tras di Eman mes. Esey tabata e parti di ‘bolter tur cos’. Mi tin duda cu a logra e meta di bolter, te ainda, pero esey ta un otro analisis. Loke si e la logra e tempo ey (esta Eman), ta pa bolter e liderazgo. Actualmente Cicilia ta Minister di Turismo, Transporte y Labor. Pues e no ta drenta politica awe. Algo ta algo. Aunke mi por compronde cu ainda bo por pensa cu esey NO ta suficiente pa e bira lider di e partido berde  

Pero awor ta bin e cos mes!. Tin un diferencia grandi entre tin experiencia politico y tin experiencia liderando un partido grandi den momento di presion. Y sigur un partido manera AVP. Esey ta precisamente e tereno caminda Cicilia ainda mester proba su mes. 

Un di e preguntanan mas importante cu mi ta tende y ta pensa ariba tambe, ta di con independiente e liderazgo nobo lo ta realmente. Mike Eman a lidera AVP pa alrededor di 25 aña y ya na januari e la bisa publicamente cu Cicilia tabata su preferencia pa sigui como lider. E transicion pues no ta bin di nada; Cicilia a wordo prepara y posiciona durante tempo. Pero e preparacion ey tabata ‘suficiente’?

Pero precisamente esey por crea un otro problema: unda Cicilia su propio liderazgo ta cuminsa y unda influencia di e generacion anterior ta termina? Tin ta papia cu Cicilia awor lo bira un marioneta manipula pa un grupo cu lo wordo yama ‘consehero’. Esey tambe mi a tende. 

Ta completamente normal si pa un lider nobo rodona su mes cu conseheronan cu experiencia. Esaki por ta un fortaleza. E peliger ta solamente ora cu e conseho bira direccion of instruccion, y e lider nobo no ta wordo mira como e persona cu ta tuma e decision final.  Manera mi a bisa, un marioneta, un titere. Si den bista di publico e bira un titere, e lo perde gran parti di su credibilidad. Cicilia lo mester mustra relativamente lihe cu e por scucha conseho, pero tambe bisa “no” ora su propio conviccion ta diferente. Aki hopi tin duda. Noticiacla tin un encuesta andando aworaki pa midi esaki entre e lectornan di Noticiacla. 

ARTHUR DOWERS

E posible relacion cu Arthur Dowers, ta agrega un dimension HOPI interesante. Laga mi splica bo pakico! Dowers tin hopi experiencia parlamentario y actualmente ta e Minister di Husticia. Na augustus el a laga habri e posibilidad di un futuro candidatura pa Minister-President, sin anuncia uno oficialmente cerca Noticiacla. Si finalmente AVP opta pa un construccion caminda Cicilia ta lider di partido pero Dowers ta Minister-President, e division di poder mester ta extraordinariamente cla. Sinoooo….  Pakico? Well,  un lider di partido no por bira un subordinador politico di su propio prome minister, pero un prome minister tampoco por goberna solamente via instruccion di Cas di Partido. Esey ta un  balans delicado cu ta funciona solamente si tin bon acuerdo, confianza mutuo suficiente y delimitacion cla di responsabilidad. Y aki tin hopi cu tin duda cu esaki lo ta e caso. 

IMAGEN DI CICILIA 

Tambe tin cuestion tocante imagen. Si, mi tambe a tende esaki hopi y tambe tin pensamento similar. Cicilia su forma mas informal di bisti ultimo tempo , a genera HOPI comentario publico. Aki ta papia di e critica cu e no ta bistiendo dashi mas ultimo tempo, y cu su carsonnan ta ‘preta’. Hasta a cuminsa haci bofon di su bistimento. Pero pa midi capacidad politico, vestuario no ta un criterio serio riba su mes. Un forma di bisti mas informal ta proyecta un apelacion na e generacionnan mas hoben y indicacion di renobacion di tradicion. Ami cu bo por pensa kico cu nos kier riba e tereno aki, pero e vestuario no mester ta un issue. Sinembargo, si.. Sinembargo, politica tambe ta percepcion. Y percepcion ta MAL COS!  Un lider mester comprende cu manera e presenta su mes, comunica, reacciona bou presion y representa e institucion, por influencia con publico ta percibi su autoridad. Carson demasiado preta ta desvia atencion, genera ridiculisacion innecesario, y como tal ta traha contraproductivo. E reto no ta pa Cicilia bira un copia di Mike Eman of di ningun otro lider (ni den su forma di bisti), sino pa construi un imagen autentico cu alavez inspira confianza.

Su edad tampoco mester bira argumento automatico contra dje. Ningun lider ta haya experiencia sin un prome oportunidad. E pregunta mas relevante ta si e preparacion cu Cicilia a haya durante añanan cerca di Mike Eman, su experiencia como lijsttrekker y awor como minister ta suficiente pa haci e salto pa liderazgo completo.

Y ta aki e punto principal ta sinta.

AVP mes ta presenta e cambio como un “Era di Relevo”, un transicion na un generacion nobo. Pero relevo solamente ta exitoso ora e generacion nobo realmente bira responsable di e decisionnan. Si Cicilia ta depende constantemente riba un circulo di veterano pa determina e rumbo, e lo tin dificultad pa establece autoridad propio. Si, al contrario, e ignora experiencia solamente pa demonstra independencia, e por comete otro error.

CONCLUSION

E evidencia publico actual no ta permiti ami cubo (aunke bo tin tur derecho pa pensa loke bo kier), conclui cu Wendrick Cicilia lo ta un lider exitoso, pasobra aparentemente e no ta bira e prome minister tumando liderazgo di AVP over. Pero mescos por bisa cu e trayecto actual di Cicilia NO ta sostene e idea cu e ta completamente sin preparacion. E ta (bon) studia, por conta cu bon mentor, y ya caba a lidera lista electoral di AVP, y a sirbi como minister ultimo dos añanan. Cu nos ta pensa cu esaki tabata simplemente pa ‘trankilisa emocion den partido’ ta otro cos. Importante tambe ta cu e partido ta indicando cu su transicion a wordo prepara durante tempo.

Su prueba real awor no ta su edad, su dashi of su fashi. Ta tres otro cos: si e por tuma decision independiente, si e por mantene autoridad entre figuranan cu tin mas experiencia cu ne, y si e por transforma e respaldo cu Mike Eman a dun’e den un liderazgo cu ta pertenece na Wendrick Cicilia mes.

Pasobra, ban ta serio!.. Hereda liderazgo ta un cos. Bira lider ta full un otro cos!