Arends-Reyes: Congreso di AVP ta uni experiencia cu talento nobo

ORANJESTAD — Lider di fraccion di AVP, Jennifer Arends-Reyes, ta invita miembronan di partido pa participa na Congreso di AVP diasabra 4 di october, di 9:00 pa 11:30 di mainta na Marriott Ballroom.

Segun Arends-Reyes, e congreso ta marca un paso importante den e “era di relevo”, caminda AVP kier combina e experiencia acumula durante añanan cu talento nobo pa sigui traha pa progreso di Aruba.

El a bisa cu e partido ta enfoca riba asuntonan cu ta toca bida diario, manera enseñansa, salud, infrastructura, husticia y oportunidadnan economico. Segun dje, e meta ta no solamente scucha preocupacionnan di comunidad, sino tambe entrega resultado concreto.

Arends-Reyes a indica cu AVP kier sigui pone pueblo na prome lugar y crea espacio pa generacionnan nobo contribui den futuro di partido.

“Nos ta sigui traha cu curason y alma pa tur hende cu ta biba na nos dushi Aruba,” el a expresa.